Salmo 91: Awit ng Pagtitiwala sa Diyos

I want to share this Psalm 91 Tagalog version where in I pray this everyday. May we all get reminded of God's goodness and assurance of his love for us. Just seek him and you'll find.

Awit ng Pagtitiwala sa Diyos"

    ¹Siyang naghahangad ng pagkupkop ng Kataas-taasan,

    At nananatili sa kalinga niyong Makapangyarihan;

    ²Makapagsasabi sa kanyang Panginoon: “Muog ka’t tahanan,

    Ikaw ang aking Diyos, ang Diyos na tangi kong pinagtiwalaan.”

    ³Ikaw’y ililigtas niya sa panganib, sa umang na bitag,

    At kahit ano mang mabigat na salot di ka magdaranas.

    ⁴Lulukuban niya sa lilim ng kanyang malabay na pakpak,

    Sa kalinga niya ay natitiyak mo na ikaw ay ligtas;

    Iingatan niya’t ipagsasanggalang, pagkat siya’y tapat.

    ⁵Pagsapit ng gabi, di ka matatakot sa anumang bagay,

    Maging sa gagawing biglaang paglusob pagsapit ng araw.

    ⁶Ni sa ano pa mang darating na salot pagkagat ng dilim,

    Di ka matatakot sa kasamaan mang araw kung dumating.

    ⁷Kahit na mabuwal sa iyong harapan ang sanlibong tao,

    Sa iyong paligid ang bilang ng patay maging sampung libo;

    Di ka matatakot, at natitiyak mong di ka maaano.

    ⁸Ikaw’y nagmamasid at sa panonood iyong mamamasdan,

    Yaong masasama ay makikita mong pinarurusahan.

    ⁹Sapagkat si Yahweh ang iyong ginawang tagapagsanggalang,

    At ang pinili mong mag-iingat sa ’yo’y Kataas-taasan,

    ¹⁰Di mo aabuting ikaw’y mapahamak, at walang daratal

    Kahit anong uring mga paghihirap sa iyong tahanan.

    ¹¹Susuguin niya ang maraming anghel, sila’ng susubaybay,

    Kahit saang dako ikaw maparoon, tiyak iingatan.

    ¹²Sa kanilang palad ay itatayo ka’t, sila’ng magtataas

    Nang hindi masaktan ang mga paa mo sa batong matalas.

    ¹³Kahit ang tapakan mo ay mga leon, ahas na mabagsik,

    Di ka maaano sa mga serpiyente’t leong mababangis.

    ¹⁴Ang sabi ng Diyos, “Aking ililigtas ang tapat sa akin,

    At iingatan ko ang sinumang taong ako’y kikilanlin.

    ¹⁵Pag sila’y tumawag, laging handa ako na sila’y pakinggan,

    Aking sasamahan at kung may hilahil ay sasaklolohan;

    Aking ililigtas at ang bawat isa ay pararangalan.

    ¹⁶Sila’y bibigyan ko’t gagantimpalaan ng mahabang buhay,

    At nakatitiyak na ang tatamuhin nila’y kaligtasan!”